Ne neue Verell us em Dörp                                                            

Et wor jestern Owend en biske länger jeworde, denn mer
wore ob ne 70stichste Jeburtstach injelade.
Nu ist dat jo he im Dörp praktisch, do kannste överall zu Fuss hinkumme oder mit dem Rädsche.
(Do kannste ä biske mi drinke, wenn Lust häst un kütz emmer jut no Hus)
Also wie jesacht, dä Wimmersdörfer’s Karl is 70 jewohde und dat wohd jefiert. Die hant sisch dat richtisch wat koste loote, nä, dat muss isch schon saje, die hant he dä *Alde Bahnhof* jemietet, <do musse immer vorbestelle, sons krisse do kinne Platz >.
Et wor alles do, wat he Rang und Name hät, isch och.
Dä Karl, dat is so ne rischtije Vereinsmeier, dä is im Schützeverein, Heimatverein, Sportverein, Gesangverein, Kejelklub und in de
Partei.
Wat för ehn sach ich nit, dat muss dä jo alleen wisse, de min is die nit.

Dat Mia, dem sin Frau is mit misch fröher en de Schol jejange,
dat däht sich hüt ne Deu ahn, dat glööfste nit. Säht dat jestern för misch, „ Ach wie schön dass Du gekommen bist < dat blöde Huhn, dabei han isch en Inladung uf Büttepier von vor 3 Mont jekriet >. Wie geht’s Dir denn so“? Isch kick dem ahn und sach: „Hörens Mia, isch bin et, Du kannst dä Deu wegdonn, usserdem ham mer uns jestern Morjen beim Metzger jesenn un uns öwer de beste Wöschkes ungerhalde“.
„Ja, „säht dat för misch,“das war gestern, aber Heute ist wieder ein anderer Tag. Probier doch mal am Buffet den Fich
und das Fleich. Ich muss mal rüber, da sitzt der Parteivorsitzende mit Frau.“
Isch konnt nix mi saje, denn wenn ne Rheinländer vürnehm wöhd, dann säht dä bei Fisch und Fleisch ki *sch* mi,
nä dann wöhd dat janz elejant usjesproche, nämlich Fleich und Fich.
Also is dat zu die Haute Volaute örowerschlawenzelt um do
zu *small talken* oder wie dat jetz uf Neudeutsch heesst.

Isch han so bei misch jedacht, kannst mo kicke, dat wor eijentlich nit janz so schlau en de Schul, nä unger uns, dat wor zu doof ne Emmer Wasser umzudeue, äwer dat hät op sin Art un Wies och Karrier jemaht. Hät sich dä reichste Buuer jeschnappt un schlanwenzelt um die richtije Lütt eröm, kannste mol kicke, dat jeht och.

Na ja, sons wor et janz nett und en paar vernünftije Lütt wore och do und do iss et ä biske später jeworde un jetzt muss isch eschmol en Tass Kaffee drinke.

 

                                                                               (c) by KUK